El lagh in april

Sera mèzza scura e longa
d’on april ormai inoltraa
che ghe ved in su la sponda
del lagh indormetaa.

Sora l’acqua che borbòtta
i penser volen lontan,
i noster bocch disen nagòtta
e se strengiom fòrt i man.

Chissà quanti innamoraa
su i barch sòtta i stèll,
chissà in quanti s’hinn basaa
settà giò magari su on basèll.

E quand guardi i tò oeucc ciar
compagn di stèll in ciel
voraria tornà in su l’altar
a tirat indree ancamò el vel.

Con la fòrza de l’amor
semper insema emm remaa
sòtta l’acqua e sòtta el so
con denanz on lagh de traversà.

E stasera, sora l’onda,
la “Lucia” la se fa ninà,
come nunch, in su la sponda,
de l’amor se femm ciappà.

Quanti april ch’è ormai passaa
da quel dì che t’hoo sposaa
quanti stèll che s’è smorzaa
dal prim dì che t’hoo basaa.

Con la luna a moeuj in de l’acqua scura,
su la nostra barca segùtom a remà
contra la corrent de la vitta dura
finchè el temp el finissarà.

da Renato Baroni - (Bovisio Masciago)
.